meri tarah ki mohabbat tumhein agar ho jae

mirī tarah kī mohabbat tumheñ agar ho jaa.e

shadīd shauq tumhārā shadīd-tar ho jaa.e

ye soch soch ke bedār bār-bār huā

huī nahīñ hai to mumkin hai ab sahar ho jaa.e

chalā hai dil se nikal kar dimāġh kī jānib

ye aadmī mire andar na dar-ba-dar ho jaa.e

mahāz-e-jang pe laayā huuñ saath chand gulāb

du'ā karo ki ye hathiyār kārgar ho jaa.e

Darā rahā hai tirā 'ujlatī chalan mujh ko

tirī tavīl masāfat na muḳhtasar ho jaa.e

sunā rahā huuñ tujhe dāstān-e-'arz-o-niyāz

ḳhudā kare ki tire dil pe kuchh asar ho jaa.e

ye she'r aap ne 'āsim' kahā hai ḳhuub magar

kuchh aur sochiye mumkin hai ḳhūb-tar ho jaa.e

meri tarah ki mohabbat tumhein agar ho jae

shadid shauq tumhaara shadid-tar ho jae

ye soch soch ke bedar bar-bar hua

hui nahin hai to mumkin hai ab sahar ho jae

chala hai dil se nikal kar dimagh ki jaanib

ye aadmi mere andar na dar-ba-dar ho jae

mahaz-e-jang pe laya hun sath chand gulab

du'a karo ki ye hathiyar kargar ho jae

Dara raha hai tera 'ujlati chalan mujh ko

teri tawil masafat na muKHtasar ho jae

suna raha hun tujhe dastan-e-'arz-o-niyaz

KHuda kare ki tere dil pe kuchh asar ho jae

ye she'r aap ne 'asim' kaha hai KHub magar

kuchh aur sochiye mumkin hai KHub-tar ho jae