meri udasi ka naqsh-e-pa hai udas lafzon ka ek jangal

mirī udāsī kā naqsh-e-pā hai udaas lafzoñ kā ek jangal

ye ġham kī rātoñ ko jāntā hai udaas lafzoñ kā ek jangal

kisī kī āñkhoñ meñ dhīre dhīre utar rahā hai namī kā bādal

qalam se kis ke nikal rahā hai udaas lafzoñ kā ek jangal

shikasta kāġhaz par āñsuoñ kā banā huā hai jo ek tālāb

vo merī āñkhoñ se bah rahā hai udaas lafzoñ kā ek jangal

uThā.ī kal raat diary aur maiñ ne kar Daalī nazr-e-ātish

so saath us ke hī jal gayā hai udaas lafzoñ kā ek jangal

ki dil meñ jitnī aziyyateñ thiiñ qalam se 'tāhir' unheñ likhā hai

ġhazal kī sūrat meñ Dhal chukā hai udaas lafzoñ kā ek jangal

meri udasi ka naqsh-e-pa hai udas lafzon ka ek jangal

ye gham ki raaton ko jaanta hai udas lafzon ka ek jangal

kisi ki aankhon mein dhire dhire utar raha hai nami ka baadal

qalam se kis ke nikal raha hai udas lafzon ka ek jangal

shikasta kaghaz par aansuon ka bana hua hai jo ek talab

wo meri aankhon se bah raha hai udas lafzon ka ek jangal

uThai kal raat diary aur main ne kar Dali nazr-e-atish

so sath us ke hi jal gaya hai udas lafzon ka ek jangal

ki dil mein jitni aziyyaten thin qalam se 'tahir' unhen likha hai

ghazal ki surat mein Dhal chuka hai udas lafzon ka ek jangal