مری اجڑی جوانی کا ہے بس اتنا نشاں باقی

مری اجڑی جوانی کا ہے بس اتنا نشاں باقی

نشیمن جل گیا لیکن ابھی تک ہے دھواں باقی

خدا جانے سزا ہم کو ملی ہے کن گناہوں کی

کہ اپنے ملک میں ہی اب نہیں اپنی زباں باقی

مکیں جتنے بھی ہیں سب میہماں دو چار دن کے ہیں

رہے گا اس زمانے میں فقط وہ لا مکاں باقی

حیات و موت کی ہر آزمائش ختم ہے تو کیا

ابھی روز قیامت کا بھی ہے اک امتحاں باقی

نریشؔ احساس کا یوں منجمد ہونا معاذ اللہ

نہ فریاد و فغاں باقی نہ دل باقی نہ جاں باقی