meri ujDi jawani ka hai bas itna nishan baqi

mirī ujḌī javānī kā hai bas itnā nishāñ baaqī

nasheman jal gayā lekin abhī tak hai dhuāñ baaqī

ḳhudā jaane sazā ham ko milī hai kin gunāhoñ kī

ki apne mulk meñ hī ab nahīñ apnī zabāñ baaqī

makīñ jitne bhī haiñ sab mehmāñ do-chār din ke haiñ

rahegā is zamāne meñ faqat vo lā-makāñ baaqī

hayāt-o-maut kī har āzmā.ish ḳhatm hai to kyā

abhī roz-e-qayāmat kā bhī hai ik imtihāñ baaqī

'naresh' ehsās kā yuuñ munjamid honā ma.āz-allāh

na fariyād-o-fuġhāñ baaqī na dil baaqī na jaañ baaqī

meri ujDi jawani ka hai bas itna nishan baqi

nasheman jal gaya lekin abhi tak hai dhuan baqi

KHuda jaane saza hum ko mili hai kin gunahon ki

ki apne mulk mein hi ab nahin apni zaban baqi

makin jitne bhi hain sab mehman do-chaar din ke hain

rahega is zamane mein faqat wo la-makan baqi

hayat-o-maut ki har aazmaish KHatm hai to kya

abhi roz-e-qayamat ka bhi hai ek imtihan baqi

'naresh' ehsas ka yun munjamid hona maaz-allah

na fariyaad-o-fughan baqi na dil baqi na jaan baqi