مری ان کی نگاہیں مل رہی ہیں

مری ان کی نگاہیں مل رہی ہیں

نئی الفت کی راہیں مل رہی ہیں

تڑپ اٹھتے ہیں اکثر وہ بھی سن کر

اب آہوں کو پناہیں مل رہی ہیں

تری منزل ہے بد تر بت کدوں سے

خصوصاً خانقاہیں مل رہی ہیں

سبق لیتا ہوں ہر ٹھوکر سے اپنی

مجھے یوں درس گاہیں مل رہی ہیں

بنی جاتی ہیں محراب محبت

جو انگڑائی میں باہیں مل رہی ہیں

مجھے کچھ شور ناقوس و اذاں سے

ترے ملنے کی راہیں مل رہی ہیں

ملیں گے دل سے اک دن وہ ریاضیؔ

ابھی ان سے نگاہیں مل رہی ہیں