meri zat ka hayula teri zat ki ikai

mirī zaat kā hayūlā tirī zaat kī ikaa.ī

koī ham-safar hai merā ki hai terī ḳhud-numā.ī

maiñ huuñ pur-sukūñ azal se maiñ huuñ pur-sukūñ abad tak

magar aañkh kah rahī hai nahīñ tujh se āshnā.ī

maiñ to luT chukā zamāne! mire paas kyā rahā hai

mire hoñT sil chuke haiñ maiñ bhalā duuñ kyā duhā.ī

ye farār kā hai lamha ki qarār kī hai sūrat

tirī chāñd sī jabīñ par nahīñ dāġh-e-bevafā.ī

yahī umr bhar kā dukh hai yahī zindagī kā sukh hai

na koī fareb-e-hastī na shu.ūr-e-dil-rubā.ī

maiñ to kal bhī thā safar meñ maiñ huuñ aaj bhī safar meñ

vahī daur merī manzil vahī merī jag-hañsā.ī

maiñ 'zuhair' sochtā huuñ kabhī zaḳhm nochtā huuñ

jaane kab nasīb jaage mile fikr se rihā.ī

meri zat ka hayula teri zat ki ikai

koi ham-safar hai mera ki hai teri KHud-numai

main hun pur-sukun azal se main hun pur-sukun abad tak

magar aankh kah rahi hai nahin tujh se aashnai

main to luT chuka zamane! mere pas kya raha hai

mere honT sil chuke hain main bhala dun kya duhai

ye farar ka hai lamha ki qarar ki hai surat

teri chand si jabin par nahin dagh-e-bewafai

yahi umr bhar ka dukh hai yahi zindagi ka sukh hai

na koi fareb-e-hasti na shuur-e-dil-rubai

main to kal bhi tha safar mein main hun aaj bhi safar mein

wahi daur meri manzil wahi meri jag-hansai

main 'zuhair' sochta hun kabhi zaKHm nochta hun

jaane kab nasib jage mile fikr se rihai