مری زبان کھلی بھی تو کیا سزا دے گا

مری زبان کھلی بھی تو کیا سزا دے گا

بہت ہوا تو مجھے بزم سے اٹھا دے گا

کھڑا ہوا ہوں مثال گیاہ طوفاں میں

کوئی درخت نہیں ہوں کہ وہ گرا دے گا

جہاں سے نعرۂ مستاں وہاں سے شہنائی

دبا یہ شور تو نغمہ ہمیں سلا دے گا

بلا سے راہ کو روکے کھڑا ہے اک مجمع

کوئی تو بھیڑ سے بچنے کا راستہ دے گا

کسے یقین رہا ہے کہ حاکم دوراں

مری وفا کا مرے دور کو صلہ دے گا

بہت سے باغی و سرکش ہیں قیدیوں میں حسنؔ

کوئی تو جان پہ کھیلے گا سر کٹا دے گا