meri zaban khuli bhi to kya saza dega

mirī zabān khulī bhī to kyā sazā degā

bahut huā to mujhe bazm se uThā degā

khaḌā huā huuñ misāl-e-giyāh tūfāñ meñ

koī daraḳht nahīñ huuñ ki vo girā degā

jahāñ se na.ara-e-mastāñ vahāñ se shahnā.ī

dabā ye shor to naġhma hameñ sulā degā

balā se raah ko roke khaḌā hai ik majma.a

koī to bhiiḌ se bachne kā rāsta degā

kise yaqīn rahā hai ki hākim-e-daurāñ

mirī vafā kā mire daur ko sila degā

bahut se bāġhī-o-sarkash haiñ qaidiyoñ meñ 'hasan'

koī to jaan pe khelegā sar kaTā degā

meri zaban khuli bhi to kya saza dega

bahut hua to mujhe bazm se uTha dega

khaDa hua hun misal-e-giyah tufan mein

koi daraKHt nahin hun ki wo gira dega

jahan se nara-e-mastan wahan se shahnai

daba ye shor to naghma hamein sula dega

bala se rah ko roke khaDa hai ek majma

koi to bhiD se bachne ka rasta dega

kise yaqin raha hai ki hakim-e-dauran

meri wafa ka mere daur ko sila dega

bahut se baghi-o-sarkash hain qaidiyon mein 'hasan'

koi to jaan pe khelega sar kaTa dega