meri zaban se tera bayan mushkil hai

mirī zabān se terā bayān mushkil hai

hazār kos kī duurī zabān se dil hai

ta’alliyāñ bhī nahīñ lan-tarāniyāñ bhī nahīñ

rivāyateñ bhī nahīñ haiñ kahāniyāñ bhī nahīñ

mirī hayāt kā sarmāya haiñ tirī bāteñ

vo 'urf-e-'ām meñ kahlātī haiñ karāmāteñ

bayān kī haiñ bahut kam karāmateñ maiñ ne

chhupā rakhī haiñ hazāroñ qayāmateñ maiñ ne

dil-o-nazar kī amānat dil-o-nazar meñ hai

kahāñ vo kūcha-o-bāzār-o-rahguzar meñ hai

maqām-e-ḳhās hai ye rahguzār-e-‘ām nahīñ

vahāñ hai 'ishq jahāñ kuchh kisī se kaam nahīñ

ḳhud apne aap se kahtā huuñ aap kī bāteñ

ḳhud apne nafs pe bhī pesh kiiñ karāmateñ

sunī hai nafs ne sam'-e-qabūl se ye baat

ḳhud apne nafs meñ aa.eñ nazar tirī āyāt

yahī tarīqa-e-isbāt-e-har-karāmat hai

jo ye nahīñ to karāmat nahīñ rivāyat hai

meri zaban se tera bayan mushkil hai

hazar kos ki duri zaban se dil hai

ta’alliyan bhi nahin lan-taraniyan bhi nahin

riwayaten bhi nahin hain kahaniyan bhi nahin

meri hayat ka sarmaya hain teri baaten

wo 'urf-e-'am mein kahlati hain karamaten

bayan ki hain bahut kam karamaten main ne

chhupa rakhi hain hazaron qayamaten main ne

dil-o-nazar ki amanat dil-o-nazar mein hai

kahan wo kucha-o-bazar-o-rahguzar mein hai

maqam-e-KHas hai ye rahguzar-e-‘am nahin

wahan hai 'ishq jahan kuchh kisi se kaam nahin

KHud apne aap se kahta hun aap ki baaten

KHud apne nafs pe bhi pesh kin karamaten

suni hai nafs ne sam'-e-qabul se ye baat

KHud apne nafs mein aaen nazar teri aayat

yahi tariqa-e-isbaat-e-har-karamat hai

jo ye nahin to karamat nahin riwayat hai