dil jab se dard-e-ishq ke qabil nahin raha

dil jab se dard-e-ishq ke qābil nahīñ rahā

ik nāgavār chiiz hai ab dil nahīñ rahā

vo maiñ nahīñ rahā vo mirā dil nahīñ rahā

ab un ko muñh dikhāne ke qābil nahīñ rahā

kyā iltijā-e-dīd karūñ dekhtā huuñ maiñ

ā.īna bhī hamesha muqābil nahīñ rahā

ab vo ḳhafā hue haiñ to yuuñ bhī hai ik ḳhushī

marnā hamāre vāste mushkil nahīñ rahā

duniyā ġharaz kī rah ga.ī ab is se kyā ġharaz

chaliye ki lutf-e-shirkat-e-mahfil nahīñ rahā

sun sun ke ahl-e-ishq-o-mohabbat ke vāqi'āt

duniyā kā koī kaam bhī mushkil nahīñ rahā

duniyā ke nek-o-bad pe mirī raa.e kuchh nahīñ

ab tak idhar ḳhayāl hī maa.il nahīñ rahā

mujh se na pūchho hasrat-e-ārā.ish-e-jamāl

ā.īna ban ke un ke muqābil nahīñ rahā

ik nā-umīd ke liye itnā na sochiye

āzurda dil rahā bhī to be-dil nahīñ rahā

vo jaan le chukeñ to koī un se pūchh le

ab to kuchh us ġharīb pe fāzil nahīñ rahā

aayā na ḳhvāb meñ bhī kabhī ġhair kā ḳhayāl

ġhaflat meñ bhī maiñ aap se ġhāfil nahīñ rahā

be-bandagī bhī us kī rahī banda-parvarī

miltā rahā agarche maiñ saa.il nahīñ rahā

vo haath haiñ 'safī' mujhe ik āstīñ kā saañp

gardan meñ dost ke jo hamā.il nahīñ rahā

dil jab se dard-e-ishq ke qabil nahin raha

ek nagawar chiz hai ab dil nahin raha

wo main nahin raha wo mera dil nahin raha

ab un ko munh dikhane ke qabil nahin raha

kya iltija-e-did karun dekhta hun main

aaina bhi hamesha muqabil nahin raha

ab wo KHafa hue hain to yun bhi hai ek KHushi

marna hamare waste mushkil nahin raha

duniya gharaz ki rah gai ab is se kya gharaz

chaliye ki lutf-e-shirkat-e-mahfil nahin raha

sun sun ke ahl-e-ishq-o-mohabbat ke waqi'at

duniya ka koi kaam bhi mushkil nahin raha

duniya ke nek-o-bad pe meri rae kuchh nahin

ab tak idhar KHayal hi mail nahin raha

mujh se na puchho hasrat-e-araish-e-jamal

aaina ban ke un ke muqabil nahin raha

ek na-umid ke liye itna na sochiye

aazurda dil raha bhi to be-dil nahin raha

wo jaan le chuken to koi un se puchh le

ab to kuchh us gharib pe fazil nahin raha

aaya na KHwab mein bhi kabhi ghair ka KHayal

ghaflat mein bhi main aap se ghafil nahin raha

be-bandagi bhi us ki rahi banda-parwari

milta raha agarche main sail nahin raha

wo hath hain 'safi' mujhe ek aastin ka sanp

gardan mein dost ke jo hamail nahin raha