mana ki musht-e-KHak se baDh kar nahin hun main

maanā ki musht-e-ḳhāk se baḌh kar nahīñ huuñ maiñ

lekin havā ke rahm-o-karam par nahīñ huuñ maiñ

insān huuñ dhaḌakte hue dil pe haath rakh

yuuñ Duub kar na dekh samundar nahīñ huuñ maiñ

chehre pe mal rahā huuñ siyāhī nasīb kī

ā.īna haath meñ hai sikandar nahīñ huuñ maiñ

vo lahar huuñ jo pyaas bujhā.e zamīn kī

chamke jo āsmāñ pe vo patthar nahīñ huuñ maiñ

'ġhālib' tirī zamīn meñ likkhī to hai ġhazal

tere qad-e-suḳhan ke barābar nahīñ huuñ maiñ

lafzoñ ne pī liyā hai 'muzaffar' mirā lahū

hañgāma-e-sadā huuñ suḳhan-var nahīñ huuñ maiñ

mana ki musht-e-KHak se baDh kar nahin hun main

lekin hawa ke rahm-o-karam par nahin hun main

insan hun dhaDakte hue dil pe hath rakh

yun Dub kar na dekh samundar nahin hun main

chehre pe mal raha hun siyahi nasib ki

aaina hath mein hai sikandar nahin hun main

wo lahar hun jo pyas bujhae zamin ki

chamke jo aasman pe wo patthar nahin hun main

'ghaalib' teri zamin mein likkhi to hai ghazal

tere qad-e-suKHan ke barabar nahin hun main

lafzon ne pi liya hai 'muzaffar' mera lahu

hangama-e-sada hun suKHan-war nahin hun main