mujhe naql par bhi itna agar iKHtiyar hota

mujhe naql par bhī itnā agar iḳhtiyār hotā

kabhī fail imtihāñ meñ na maiñ baar baar hotā

jo maiñ fail ho gayā to sabhī de rahe haiñ ta.ane

koī dil-navāz hotā koī ġham-gusār hotā

mujhe aaj itnī nafrat se na dekhtī ye duniyā

jo paḌhā.ī se zarā bhī mire dil ko pyaar hotā

mire master na hote jo ulūm-o-fan meñ daanā

kabhī maulā-baḳhsh-sāhab kā na maiñ shikār hotā

vo paḌhāte vaqt darje meñ hazār baar barse

jo mujhe bhī chhī.k aatī unheñ nāgavār hotā

na maiñ tandurust hotā na kabhī schōl jaatā

kabhī sar meñ dard rahtā to kabhī buḳhār hotā

kabhī madrase meñ aatā koī aisā chaaT vaalā

ki jo muft meñ khilātā na kabhī udhār hotā

ye gadhā jo apnī ġhaflat se hai bevaqūf itnā

jo ye ḳhud ko jaan jaatā baḌā hoshiyār hotā

tire ghar meñ 'kaif' terā koī qadr-dāñ nahīñ hai

jo vatan se duur hotā to baḌā vaqār hotā

mujhe naql par bhi itna agar iKHtiyar hota

kabhi fail imtihan mein na main bar bar hota

jo main fail ho gaya to sabhi de rahe hain tane

koi dil-nawaz hota koi gham-gusar hota

mujhe aaj itni nafrat se na dekhti ye duniya

jo paDhai se zara bhi mere dil ko pyar hota

mere master na hote jo ulum-o-fan mein dana

kabhi maula-baKHsh-sahab ka na main shikar hota

wo paDhate waqt darje mein hazar bar barse

jo mujhe bhi chhik aati unhen nagawar hota

na main tandurust hota na kabhi school jata

kabhi sar mein dard rahta to kabhi buKHar hota

kabhi madrase mein aata koi aisa chaT wala

ki jo muft mein khilata na kabhi udhaar hota

ye gadha jo apni ghaflat se hai bewaquf itna

jo ye KHud ko jaan jata baDa hoshiyar hota

tere ghar mein 'kaif' tera koi qadr-dan nahin hai

jo watan se dur hota to baDa waqar hota