misal-e-aks kunj-e-zat se bahar raha hun main

misāl-e-aks kunj-e-zāt se bāhar rahā huuñ maiñ

ki āp-apne muqābil ā.īna ban kar rahā huuñ maiñ

ajab mausam thā jab qurbat tirī sarmāya-e-jāñ thī

vahī mausam hai aur tark-e-ta.alluq kar rahā huuñ maiñ

tumhārī mushkileñ āsāñ huī haiñ Dūbne vālo!

mujhe dekho ki saarī umr sāhil par rahā huuñ maiñ

isī māmūra-e-ḳhvābīdgāñ shahr-e-ḳhamoshāñ meñ

na jaane zindagī kā svāñg kab se bhar rahā huuñ maiñ

mujhe guzre hue lamhoñ ne itne zaḳhm baḳhshe haiñ

ki jo guzrā nahīñ us lamhe se bhī Dar rahā huuñ maiñ

shikast is ko kahūñ yā fat.h-mandī kah ke ḳhush ho luuñ

ki altāf-e-raqībāñ se bhī bahra-var rahā huuñ maiñ

dar-o-dīvār o saqf-o-bām sab apnī jagah par the

to phir kyā baat thī jis ke sabab be-ghar rahā huuñ maiñ

tirī ḳhātir jo merī ḳhud-fareb āñkhoñ ne dekhe the

unhīñ TuuTe hue ḳhvāboñ kā nauhagar rahā huuñ maiñ

bahut din ba.ad kuchh an-dekhe ḳhvāb utre haiñ āñkhoñ meñ

siyah ḳhāne meñ kyā kyā sham.a raushan kar rahā huuñ maiñ

ajab ahvāl hai dasht-e-talab meñ ḳhud-farebī kā

ki thak kar gir chukā huuñ raah bhī tai kar rahā huuñ maiñ

ye lamha lamha zinda rahne kī ḳhvāhish kā hāsil hai

ki lahza lahza apne-āp hī meñ mar rahā huuñ maiñ

isī nisbat se baḌhtī jā rahī hai tishnagī merī

ki jis sur.at se jām-e-umr ḳhālī kar rahā huuñ maiñ

misal-e-aks kunj-e-zat se bahar raha hun main

ki aap-apne muqabil aaina ban kar raha hun main

ajab mausam tha jab qurbat teri sarmaya-e-jaan thi

wahi mausam hai aur tark-e-talluq kar raha hun main

tumhaari mushkilen aasan hui hain Dubne walo!

mujhe dekho ki sari umr sahil par raha hun main

isi mamura-e-KHwabidgan shahr-e-KHamoshan mein

na jaane zindagi ka swang kab se bhar raha hun main

mujhe guzre hue lamhon ne itne zaKHm baKHshe hain

ki jo guzra nahin us lamhe se bhi Dar raha hun main

shikast is ko kahun ya fath-mandi kah ke KHush ho lun

ki altaf-e-raqiban se bhi bahra-war raha hun main

dar-o-diwar o saqf-o-baam sab apni jagah par the

to phir kya baat thi jis ke sabab be-ghar raha hun main

teri KHatir jo meri KHud-fareb aankhon ne dekhe the

unhin TuTe hue KHwabon ka nauhagar raha hun main

bahut din baad kuchh an-dekhe KHwab utre hain aankhon mein

siyah KHane mein kya kya shama raushan kar raha hun main

ajab ahwal hai dasht-e-talab mein KHud-farebi ka

ki thak kar gir chuka hun rah bhi tai kar raha hun main

ye lamha lamha zinda rahne ki KHwahish ka hasil hai

ki lahza lahza apne-ap hi mein mar raha hun main

isi nisbat se baDhti ja rahi hai tishnagi meri

ki jis surat se jam-e-umr KHali kar raha hun main