misal-e-barg main KHud ko uDana chahti hun

misāl-e-barg maiñ ḳhud ko uḌānā chāhtī huuñ

havā-e-tund pe maskan banānā chāhtī huuñ

vo jin kī āñkhoñ meñ hotā hai zindagī meñ malāl

usī qabīle se ḳhud ko milānā chāhtī huuñ

jahāñ ke band haiñ sadiyoñ se mujh pe darvāze

maiñ ek baar usī ghar meñ jaanā chāhtī huuñ

sitam-shi.ār kī chaukhaT pe adl kī zanjīr

barā-e-dād-rasī ab hilānā chāhtī huuñ

na-jāne kaise guzārūñgī hijr kī saa.at

ghaḌī ko toḌ ke sab bhuul jaanā chāhtī huuñ

masāfatoñ ko mile manzil-e-talab 'naināñ'

vafā kī raah meñ apnā Thikāna chāhtī huuñ

misal-e-barg main KHud ko uDana chahti hun

hawa-e-tund pe maskan banana chahti hun

wo jin ki aankhon mein hota hai zindagi mein malal

usi qabile se KHud ko milana chahti hun

jahan ke band hain sadiyon se mujh pe darwaze

main ek bar usi ghar mein jaana chahti hun

sitam-shiar ki chaukhaT pe adl ki zanjir

bara-e-dad-rasi ab hilana chahti hun

na-jaane kaise guzarungi hijr ki saat

ghaDi ko toD ke sab bhul jaana chahti hun

masafaton ko mile manzil-e-talab 'nainan'

wafa ki rah mein apna Thikana chahti hun