misal-e-KHwab hamesha kisi safar mein rahe

misāl-e-ḳhvāb hamesha kisī safar meñ rahe

ham apnī niiñd meñ bhī us kī rahguzar meñ rahe

kisī kī yaad ke bādal barasne vaale the

bahut ḳharāb thā mausam so aaj ghar meñ rahe

tamām umr usī jism se shikāyat thī

tamām umr usī jism ke khañDar meñ rahe

matā-e-dard ko āḳhir kahāñ kahāñ rakhte

so mere ganj-e-girāñ-māya-e-hunar meñ rahe

ye zindagī hai 'qamar' yā ki jañgaloñ kā safar

har ek lamha yahāñ rāh-e-pur-ḳhatar meñ rahe

misal-e-KHwab hamesha kisi safar mein rahe

hum apni nind mein bhi us ki rahguzar mein rahe

kisi ki yaad ke baadal barasne wale the

bahut KHarab tha mausam so aaj ghar mein rahe

tamam umr usi jism se shikayat thi

tamam umr usi jism ke khanDar mein rahe

mata-e-dard ko aaKHir kahan kahan rakhte

so mere ganj-e-giran-maya-e-hunar mein rahe

ye zindagi hai 'qamar' ya ki jangalon ka safar

har ek lamha yahan rah-e-pur-KHatar mein rahe