misal-e-mushk mujassam ghazal ki KHushbu

misāl-e-mushk mujassam ġhazāl kī ḳhushbū

kahāñ guloñ meñ hai us be-misāl kī ḳhushbū

dahaktī jaa.e taḳhayyul meñ ḳhadd-o-ḳhāl kī aañch

mashām-e-jāñ meñ hai mahke jamāl kī ḳhushbū

tabī.atoñ meñ takabbur anā tā-vaqteki

lahū meñ dauḌe nā rizq-e-halāl kī ḳhushbū

shaguftagī ke havāle haiñ saarī shāḳhoñ par

chaman meñ bikhrī hai tere maqāl kī ḳhushbū

ka.ī darīche muāfī ke khol detī hai

nazar se uThtī huī infi.āl kī ḳhushbū

to kyā ki qurb mayassar nahīñ pa bistar kī

shikan shikan meñ hai dahke visāl kī ḳhushbū

kalām-e-fan pe na maġhrūr ho kabhī 'mīnā'

urūj-e-fan meñ hī mahke zavāl kī ḳhushbū

misal-e-mushk mujassam ghazal ki KHushbu

kahan gulon mein hai us be-misal ki KHushbu

dahakti jae taKHayyul mein KHadd-o-KHal ki aanch

masham-e-jaan mein hai mahke jamal ki KHushbu

tabiaton mein takabbur ana ta-waqteki

lahu mein dauDe na rizq-e-halal ki KHushbu

shaguftagi ke hawale hain sari shaKHon par

chaman mein bikhri hai tere maqal ki KHushbu

kai dariche muafi ke khol deti hai

nazar se uThti hui infial ki KHushbu

to kya ki qurb mayassar nahin pa bistar ki

shikan shikan mein hai dahke visal ki KHushbu

kalam-e-fan pe na maghrur ho kabhi 'mina'

uruj-e-fan mein hi mahke zawal ki KHushbu