misl-e-abr-e-karam hum jahan bhi gae dasht ke dasht gulzar bante gae

misl-e-abr-e-karam ham jahāñ bhī ga.e dasht ke dasht gulzār bante ga.e

zard chehre the jhulse hue dhuup se tāzgī pā ke gulnār bante ga.e

jitnā bahtā gayā zindagī kā lahū aur hote ga.e hausle surḳh-rū

sahl hotī ga.ī manzil-e-justujū rāste aur hamvār bante ga.e

kuchh safar kī thakan se badan chor thā kuchh zamīñ saḳht thī āsmāñ duur thā

kuchh tirī zulf ke saa.e bhī the ghane phir yahī saa.e dīvār bante ga.e

laakh āvāra o ābla-pā sahī manzileñ to haiñ qadmoñ se lipTī huī

vo hamīñ haiñ ki jab dhun samā.ī kabhī barq-pā nūr-e-raftār bante ga.e

avval avval thiiñ rāheñ baḌī pur-ḳhatar kaun thā juz ġham-e-dil sharīk-e-safar

phir jo paḌne lagī manziloñ par nazar dost dushman sabhī yaar bante ga.e

ham bhī Thahre 'mujīb' ek shorīda-sar jab na paayā koī qadr-dān-e-hunar

aap apne junūñ ke sanā-ḳhvāñ hue aap apne parastār bante ga.e

misl-e-abr-e-karam hum jahan bhi gae dasht ke dasht gulzar bante gae

zard chehre the jhulse hue dhup se tazgi pa ke gulnar bante gae

jitna bahta gaya zindagi ka lahu aur hote gae hausle surKH-ru

sahl hoti gai manzil-e-justuju raste aur hamwar bante gae

kuchh safar ki thakan se badan chor tha kuchh zamin saKHt thi aasman dur tha

kuchh teri zulf ke sae bhi the ghane phir yahi sae diwar bante gae

lakh aawara o aabla-pa sahi manzilen to hain qadmon se lipTi hui

wo hamin hain ki jab dhun samai kabhi barq-pa nur-e-raftar bante gae

awwal awwal thin rahen baDi pur-KHatar kaun tha juz gham-e-dil sharik-e-safar

phir jo paDne lagi manzilon par nazar dost dushman sabhi yar bante gae

hum bhi Thahre 'mujib' ek shorida-sar jab na paya koi qadr-dan-e-hunar

aap apne junun ke sana-KHwan hue aap apne parastar bante gae