مثل گل آدمی مثل خار آدمی

مثل گل آدمی مثل خار آدمی

ہر طبیعت کے ہوتے ہیں یار آدمی

کہہ رہا تھا یہ اک با وقار آدمی

آدمی سے کرے صرف پیار آدمی

اپنی پلکوں پہ شمعیں جلائے ہوئے

خواہشوں کا ہے اپنی مزار آدمی

آدمی ہی سے ملتا ہے دل کو سکوں

چھین لیتا ہے دل کا قرار آدمی

ہے ستاروں سے آگے بھی اس کا گزر

یہ نہ سمجھو کہ ہے بس غبار آدمی

جانور جانور سے پشیماں نہیں

آدمی سے مگر شرمسار آدمی

اے ضمیرؔ آج ملتے ہیں ہر موڑ پر

بے قرار آدمی دل فگار آدمی