misl-e-gul aadmi misl-e-Khaar aadmi

misl-e-gul aadmī misl-e-ḳhār aadmī

har tabī.at ke hote haiñ yaar aadmī

kah rahā thā ye ik bā-vaqār aadmī

aadmī se kare sirf pyaar aadmī

apnī palkoñ pe sham.eñ jalā.e hue

ḳhvāhishoñ kā hai apnī mazār aadmī

aadmī hī se miltā hai dil ko sukūñ

chhīn letā hai dil kā qarār aadmī

hai sitāroñ se aage bhī us kā guzar

ye na samjho ki hai bas ġhubār aadmī

jānvar jānvar se pashemāñ nahīñ

aadmī se magar sharmsār aadmī

ai 'zamīr' aaj milte haiñ har moḌ par

be-qarār aadmī dil-figār aadmī

misl-e-gul aadmi misl-e-KHar aadmi

har tabiat ke hote hain yar aadmi

kah raha tha ye ek ba-waqar aadmi

aadmi se kare sirf pyar aadmi

apni palkon pe shamen jalae hue

KHwahishon ka hai apni mazar aadmi

aadmi hi se milta hai dil ko sukun

chhin leta hai dil ka qarar aadmi

hai sitaron se aage bhi us ka guzar

ye na samjho ki hai bas ghubar aadmi

jaanwar jaanwar se pasheman nahin

aadmi se magar sharmsar aadmi

ai 'zamir' aaj milte hain har moD par

be-qarar aadmi dil-figar aadmi