مثل ناوک جو نگاہوں سے اشارہ نکلا

مثل ناوک جو نگاہوں سے اشارہ نکلا

دل دھڑکتا ہوا پہلو سے ہمارا نکلا

عارض یار پہ زلفوں کے بکھر جانے سے

چاند ڈوبا ہوا بدلی سے دوبارہ نکلا

حاصل صحرا نوردی ہے ہماری وحشت

خاک چھانی تو مقدر کا ستارہ نکلا

بے تکے جام پلائے جو مجھے ساقی نے

ضبط کا باندھ کھلا نام تمہارا نکلا

طے شدہ سال میسر تھی جوانی ہم کو

کچھ برس ٹھیک سو باقی میں خسارہ نکلا

ہم بھی سوکھے ہوئے تالاب کا حصہ نکلے

وہ بھی پیاسا کسی دریا کا کنارا نکلا

اب تو اللہ سے شکوہ بھی نہیں کر سکتے

دل بھی کم بخت طرفدار تمہارا نکلا

لاکھ بہتر تھا کہ سینے سے لگاتے پتھر

پھول کے بھیس میں آتش کا شرارہ نکلا

محورؔ صبر پہ اک صبر کی آیت پڑھ کر

کھینچ کر جسم سے جاں جان سے پیارا نکلا