misl-e-sahra hai rifaqat ka chaman bhi ab ke

misl-e-sahrā hai rifāqat kā chaman bhī ab ke

jal bujhā apne hī sho.aloñ meñ badan bhī ab ke

ḳhār-o-ḳhas huuñ to sharar-ḳheziyāñ dekhūñ phir se

aañkh le aa.ī hai ik aisī kiran bhī ab ke

ham to vo phuul jo shāḳhoñ pe ye socheñ pahroñ

kyuuñ sabā bhuul ga.ī apnā chalan bhī ab ke

manziloñ tak nazar aatā hai shikastoñ kā ġhubār

saath detī nahīñ aise meñ thakan bhī ab ke

munsalik ek hī rishte meñ na ho jaa.e kahīñ

tire māthe tire bistar kī shikan bhī ab ke

be-gunāhī ke libāde ko utāro bhī 'nasīr'

raas aa jaa.e agar jurm-e-suḳhan bhī ab ke

misl-e-sahra hai rifaqat ka chaman bhi ab ke

jal bujha apne hi shoalon mein badan bhi ab ke

KHar-o-KHas hun to sharar-KHeziyan dekhun phir se

aankh le aai hai ek aisi kiran bhi ab ke

hum to wo phul jo shaKHon pe ye sochen pahron

kyun saba bhul gai apna chalan bhi ab ke

manzilon tak nazar aata hai shikaston ka ghubar

sath deti nahin aise mein thakan bhi ab ke

munsalik ek hi rishte mein na ho jae kahin

tere mathe tere bistar ki shikan bhi ab ke

be-gunahi ke libaade ko utaro bhi 'nasir'

ras aa jae agar jurm-e-suKHan bhi ab ke