misre ke wast mein khaDa hun

misre ke vast meñ khaḌā huuñ

shāyad maiñ andhā ho gayā huuñ

so.e hue biij jaag jaa.eñ

khetoñ meñ ashk bo rahā huuñ

dahlīz ke paas se kisī ke

pheñke hue ḳhvāb chun rahā huuñ

bistar meñ raat so rahī hai

maiñ tere huzūr jāgtā huuñ

saarī murda mohabbatoñ ko

hairat se chhū ke dekhtā huuñ

TuuTī huī raqam kī tarah se

bekār meñ ḳharch ho gayā huuñ

bhūlā huuñ samundaroñ pe chalnā

galiyoñ meñ Dūbne lagā huuñ

talvār pe naqsh khod kar kyā

qātil se daad chāhtā huuñ

bahrūp badal liyā hai tū ne

maiñ bhī to tamāshā ban gayā huuñ

misre ke wast mein khaDa hun

shayad main andha ho gaya hun

soe hue bij jag jaen

kheton mein ashk bo raha hun

dahliz ke pas se kisi ke

phenke hue KHwab chun raha hun

bistar mein raat so rahi hai

main tere huzur jagta hun

sari murda mohabbaton ko

hairat se chhu ke dekhta hun

TuTi hui raqam ki tarah se

bekar mein KHarch ho gaya hun

bhula hun samundaron pe chalna

galiyon mein Dubne laga hun

talwar pe naqsh khod kar kya

qatil se dad chahta hun

bahrup badal liya hai tu ne

main bhi to tamasha ban gaya hun