مٹ کر بھی غم دوست میں آرام نہ آیا

مٹ کر بھی غم دوست میں آرام نہ آیا

حد ہو گئی مرنا بھی مرے کام نہ آیا

عشاق کی قسمت کو برا کہتی ہے دنیا

صد شکر کہ تم پر کوئی الزام نہ آیا

ہرچند بغاوت پہ ابھارا غم دل نے

لیکن مرے ہونٹوں پہ ترا نام نہ آیا

اس میں بھی کوئی مصلحت پیر مغاں تھی

محفل میں جدھر ہم تھے ادھر جام نہ آیا

کیا ہو گیا اللہ مرا جذب محبت

مدت سے کوئی دوست کا پیغام نہ آیا

ترتیب دیا جس نے محبت کا فسانہ

اس کا ہی فسانے میں کہیں نام نہ آیا

رونقؔ نہیں محفل میں تری رونق محفل

کیا بات ہے کیوں آج وہ ناکام نہ آیا