miTega kab teri zulfon ka KHam KHuda jaane

miTegā kab tirī zulfoñ kā ḳham ḳhudā jaane

khulegā kab tirā zālim bharam ḳhudā jaane

yahāñ to paatā huuñ har ik ko tishna-lab saaqī

kidhar baḌhā tirā dast-e-karam ḳhudā jaane

vahī tashaddud-e-gulchīñ vahī ġham-e-sayyād

qafas meñ haiñ ki nasheman meñ ham ḳhudā jaane

vo rāz-e-ġham jise dil meñ chhupā ke rakkhā thā

kahāñ se pā ga.ī ye chashm-e-nam ḳhudā jaane

zarūr vaj.h-e-kashākash hai kuchh na kuchh ai dost

badal gayā hai koī tum ki ham ḳhudā jaane

nigāh-e-shauq meñ 'muslim' na dair hai na haram

kahāñ raheñge hamāre qadam ḳhudā jaane

miTega kab teri zulfon ka KHam KHuda jaane

khulega kab tera zalim bharam KHuda jaane

yahan to pata hun har ek ko tishna-lab saqi

kidhar baDha tera dast-e-karam KHuda jaane

wahi tashaddud-e-gulchin wahi gham-e-sayyaad

qafas mein hain ki nasheman mein hum KHuda jaane

wo raaz-e-gham jise dil mein chhupa ke rakkha tha

kahan se pa gai ye chashm-e-nam KHuda jaane

zarur wajh-e-kashakash hai kuchh na kuchh ai dost

badal gaya hai koi tum ki hum KHuda jaane

nigah-e-shauq mein 'muslim' na dair hai na haram

kahan rahenge hamare qadam KHuda jaane