miTi hazar tamanna ek aarzu ke liye

miTī hazār tamanna ik aarzū ke liye

milā huuñ ḳhaak meñ duniyā kī aabrū ke liye

hazār chāhiyeñ dil ek aarzū ke liye

dimāġh lā.ūñ kahāñ se tumhārī bū ke liye

tumhāre dekhne vaale khaḌe haiñ chaar taraf

kidhar ko pheroge muñh ḳhātir-e-adū ke liye

uThā.ī jaatī haiñ tul tul ke teġh hāthoñ meñ

chhaTā.e jaate haiñ ḳhanjar mire gulū ke liye

ḳhumār-e-hastī-e-nā-pā.edār dekh chukā

chalā huuñ josh meñ phir sāġhar-o-subū ke liye

vo haath kyā hai jo pāband-e-jeb-o-dāmāñ ho

vo paañv kyā jo na ho terī justujū ke liye

khulī na zulf pe kuchh bhī mirī pareshānī

banā hazār zabāñ arz-e-mū-ba-mū ke liye

milā hai nutq-e-zabāñ ko ki terā zikr kare

zabāñ dahan ko milī terī guftugū ke liye

banā rahī hai nasīm-e-bahār marham-e-zaḳhm

sulajh rahe haiñ rag-e-gul mire rafū ke liye

banā gayā hameñ dīvāna ik but-e-vahshī

junūñ hai 'sho.ala' kisī shauq-e-tund-ḳhū ke liye

miTi hazar tamanna ek aarzu ke liye

mila hun KHak mein duniya ki aabru ke liye

hazar chahiyen dil ek aarzu ke liye

dimagh laun kahan se tumhaari bu ke liye

tumhaare dekhne wale khaDe hain chaar taraf

kidhar ko pheroge munh KHatir-e-adu ke liye

uThai jati hain tul tul ke tegh hathon mein

chhaTae jate hain KHanjar mere gulu ke liye

KHumar-e-hasti-e-na-paedar dekh chuka

chala hun josh mein phir saghar-o-subu ke liye

wo hath kya hai jo paband-e-jeb-o-daman ho

wo panw kya jo na ho teri justuju ke liye

khuli na zulf pe kuchh bhi meri pareshani

bana hazar zaban arz-e-mu-ba-mu ke liye

mila hai nutq-e-zaban ko ki tera zikr kare

zaban dahan ko mili teri guftugu ke liye

bana rahi hai nasim-e-bahaar marham-e-zaKHm

sulajh rahe hain rag-e-gul mere rafu ke liye

bana gaya hamein diwana ek but-e-wahshi

junun hai 'shoala' kisi shauq-e-tund-KHu ke liye