miTti hui tahzib se nafrat na kiya kar

miTtī huī tahzīb se nafrat na kiyā kar

chaupāl pe būḌhoñ kī kahānī bhī sunā kar

mā'lūm huā hai ye parindoñ kī zabānī

tham jā.egā tūfān daraḳhtoñ ko girā kar

pītal ke kaTore bhī nahīñ apne gharoñ meñ

ḳhairāt meñ chāñdī kā taqāzā na kiyā kar

mumkin hai garebānoñ meñ ḳhanjar bhī chhupe hoñ

tū shahr-e-amāñ meñ bhī na be-ḳhauf phirā kar

māñge hue sūraj se to behtar hai añdherā

tū mere liye apne ḳhudā se na duā kar

tahrīr kā ye āḳhirī rishta bhī gayā TuuT

tanhā huuñ maiñ kitnā tire maktūb jalā kar

aatī haiñ agar raat ko rone kī sadā.eñ

ham-sā.e kā ahvāl kabhī pūchh liyā kar

vo qaht-e-ziyā hai ki mire shahr ke kuchh log

jugnū ko liye phirte haiñ muTThī meñ dabā kar

miTti hui tahzib se nafrat na kiya kar

chaupal pe buDhon ki kahani bhi suna kar

ma'lum hua hai ye parindon ki zabani

tham jaega tufan daraKHton ko gira kar

pital ke kaTore bhi nahin apne gharon mein

KHairaat mein chandi ka taqaza na kiya kar

mumkin hai garebanon mein KHanjar bhi chhupe hon

tu shahr-e-aman mein bhi na be-KHauf phira kar

mange hue suraj se to behtar hai andhera

tu mere liye apne KHuda se na dua kar

tahrir ka ye aaKHiri rishta bhi gaya TuT

tanha hun main kitna tere maktub jala kar

aati hain agar raat ko rone ki sadaen

ham-sae ka ahwal kabhi puchh liya kar

wo qaht-e-ziya hai ki mere shahr ke kuchh log

jugnu ko liye phirte hain muTThi mein daba kar