miTTi ka jism aur saf-e-moatabar mein hai

miTTī kā jism aur saf-e-mo'atabar meñ hai

kitnā baḌā kamāl kaf-e-kūza-gar meñ hai

aisī havas chhipī huī qalb-e-bashar meñ hai

ghar meñ haiñ aur vus.at-e-duniyā nazar meñ hai

shauq-e-suḳhan-varī ko miTātā maiñ kis tarah

ye to rachī-basī mire qalb-o-jigar meñ hai

mil jaa.e be-qarār ko lutf-e-sukūn-e-dil

aisī to bas misāl ḳhudā hī ke ghar meñ hai

tum ko tumhārī manzil-e-maqsūd mil ga.ī

apnā to kārvāñ abhī gard-e-safar meñ hai

pahnūñ maiñ kaise atlas-o-kamḳhvāb ke libās

sūraj ġhurūb hone kā manzar nazar meñ hai

chhū legā 'shād' tū bhī kisī roz āsmāñ

vo azm aur vo josh tire bāl-o-par meñ hai

miTTi ka jism aur saf-e-mo'atabar mein hai

kitna baDa kamal kaf-e-kuza-gar mein hai

aisi hawas chhipi hui qalb-e-bashar mein hai

ghar mein hain aur wusat-e-duniya nazar mein hai

shauq-e-suKHan-wari ko miTata main kis tarah

ye to rachi-basi mere qalb-o-jigar mein hai

mil jae be-qarar ko lutf-e-sukun-e-dil

aisi to bas misal KHuda hi ke ghar mein hai

tum ko tumhaari manzil-e-maqsud mil gai

apna to karwan abhi gard-e-safar mein hai

pahnun main kaise atlas-o-kamKHwab ke libas

suraj ghurub hone ka manzar nazar mein hai

chhu lega 'shad' tu bhi kisi roz aasman

wo azm aur wo josh tere baal-o-par mein hai