miTTi tere mahakne se mujhko guman hai

miTTī tire mahakne se mujh ko gumān hai

bārish kī buuñd buuñd meñ ik dāstān hai

ye sochte ho kyuuñ ki ḳhudā bas tumheñ milā

dekho jahāñ zamīñ hai vahāñ āsmān hai

lagtā hai ghar vahī jahāñ aapas meñ pyaar ho

varna to log rahte haiñ aur ik makān hai

āñkhoñ kī bāt-chīt meñ paḌnā ye soch kar

nazroñ ke len-den meñ dil kā ziyān hai

hairat hai kaise phuul se ḳhushbū huī judā

mauqa.a mile to sochnā kyā darmiyān hai

shāyad ki aur bhī kahīñ bastī hai zindagī

lagtā hai aur bhī kahīñ aisā jahān hai

tum hī kaho ki vaqt se kyuuñ haar maan luuñ

jab ruuh meñ umañg hai dil bhī javān hai

'anvār' bazm hai sajī ho jaa.e shā.erī

urdu se ham ko ishq hai apnī zabān hai

miTTi tere mahakne se mujh ko guman hai

barish ki bund bund mein ek dastan hai

ye sochte ho kyun ki KHuda bas tumhein mila

dekho jahan zamin hai wahan aasman hai

lagta hai ghar wahi jahan aapas mein pyar ho

warna to log rahte hain aur ek makan hai

aankhon ki baat-chit mein paDna ye soch kar

nazron ke len-den mein dil ka ziyan hai

hairat hai kaise phul se KHushbu hui juda

mauqa mile to sochna kya darmiyan hai

shayad ki aur bhi kahin basti hai zindagi

lagta hai aur bhi kahin aisa jahan hai

tum hi kaho ki waqt se kyun haar man lun

jab ruh mein umang hai dil bhi jawan hai

'anwar' bazm hai saji ho jae shaeri

urdu se hum ko ishq hai apni zaban hai