miyan dil tujhe le chale husn wale

miyāñ dil tujhe le chale husn vaale

kaho aur kiyā jā ḳhudā ke havāle

idhar aa zarā tujh se mil kar maiñ ro luuñ

tū mujh se zarā mil ke aañsū bahā le

chalā ab to saath un ke tū bebasī se

lagā mere pahlū meñ furqat ke bhāle

ḳhabar-dār un ke sivā zulf o ruḳh ke

kahīñ mat nikalnā añdhere ujāle

tire aur bhī haiñ talabgār kitne

mabādā koī tujh ko vaañ se uḌā le

kahīñ qahr aisā na kiijo ki mujh ko

bulāne paḌeñ faal ta.avīz vaale

kisī kā to kuchh bhī na jāvegā lekin

paḌeñge mujhe apne jiine ke laale

tirī kuchh sifārish maiñ un se bhī kar duuñ

karegā tū kyā yaad mujh ko bhulā le

suno dilbaro gul-ruḳho mah-jabīno

maiñ tum paas aayā huuñ ik iltijā le

ḳhudā kī razā yā mohabbat se apnī

paḌā ab to aa kar tumhāre ye paale

tum apne hī qadmoñ tale us ko rakhiyo

tasallī dilāse meñ har dam sambhāle

koī us ko taklīf aisī na diijo

ki jis meñ ye ro kar kare aah naale

tumhāre ye sab naaz uThāvegā lekin

vahī bojh rakhiyo jise ye uThā le

agar dastaras ho to kiije munādī

ki phir koī siine meñ dil ko na paale

'nazīr' aah dil kī judā.ī burī hai

baheñ kyuuñ na āñkhoñ se aañsū ke naale

miyan dil tujhe le chale husn wale

kaho aur kiya ja KHuda ke hawale

idhar aa zara tujh se mil kar main ro lun

tu mujh se zara mil ke aansu baha le

chala ab to sath un ke tu bebasi se

laga mere pahlu mein furqat ke bhaale

KHabar-dar un ke siwa zulf o ruKH ke

kahin mat nikalna andhere ujale

tere aur bhi hain talabgar kitne

mabaada koi tujh ko wan se uDa le

kahin qahr aisa na kijo ki mujh ko

bulane paDen fal tawiz wale

kisi ka to kuchh bhi na jawega lekin

paDenge mujhe apne jine ke lale

teri kuchh sifarish main un se bhi kar dun

karega tu kya yaad mujh ko bhula le

suno dilbaro gul-ruKHo mah-jabino

main tum pas aaya hun ek iltija le

KHuda ki raza ya mohabbat se apni

paDa ab to aa kar tumhaare ye pale

tum apne hi qadmon tale us ko rakhiyo

tasalli dilase mein har dam sambhaale

koi us ko taklif aisi na dijo

ki jis mein ye ro kar kare aah nale

tumhaare ye sab naz uThawega lekin

wahi bojh rakhiyo jise ye uTha le

agar dastaras ho to kije munadi

ki phir koi sine mein dil ko na pale

'nazir' aah dil ki judai buri hai

bahen kyun na aankhon se aansu ke nale