میان دید کوئی وجہ التفات کھلے

میان دید کوئی وجہ التفات کھلے

کہ اس کا بند قبا شب کے ساتھ ساتھ کھلے

ہزار رمز و کنائے بہ صورت تحریر

اگر کھلے تو کسی بے ہنر کے ہاتھ کھلے

کھلا کہ عمر رواں ہے برنگ کیف و سرور

وہ خد و خال بہت چاندنی کی رات کھلے

وہ آنکھ کھلتی ہے پیہم سو وہ کھلی ہی رہے

کہاں یہ فکر ہمیں دہر بے ثبات کھلے

شراب واقعتاً ارتقائے احسن ہے

سو پی رہے ہیں مسلسل کہ یہ حیات کھلے

کسے شعور میسر ہے آشنائی کا

کسے نصیب کہ اس پر ہماری ذات کھلے