miyan-e-hind-o-pakistan ek sarhad ka jhagDa hai

miyān-e-hind-o-pakistan ik sarhad kā jhagḌā hai

vagarna is imārat ke manāre ek jaise haiñ

karachi kā kitchen ho yā vo dakkan kī rasoī ho

namak kā farq hai baigan baghāre ek jaise haiñ

pajāmoñ ke design ko badal Daalā to kyā ġham hai

hamārī bīviyoñ ke to ġharāre ek jaise haiñ

pareshāñ-hāl hai public magar donoñ mamālik ke

mirāsī cricketer filmī-sitāre ek jaise haiñ

kuñvāre log to har mulk meñ āzād phirte haiñ

magar shādī-shuda qismat ke maare ek jaise haiñ

barā.e-aqd-ḳhvānī qāziyoñ meñ farq hai lekin

karachi aur dillī ke chuvāre ek jaise haiñ

kuñvāra aadmī ho yā koī āzād leader ho

jo be-peñde ke lauTe haiñ vo saare ek jaise haiñ

nikamme rahnumā aur aql se paidal siyāsat-dāñ

hamāre ek jaise haiñ tumhāre ek jaise haiñ

yahāñ kā 'ḳhālid-e-irfāñ' vahāñ ke 'rāhat-indorī'

nire shā.ir haiñ donoñ ke sitāre ek jaise haiñ

miyan-e-hind-o-pakistan ek sarhad ka jhagDa hai

wagarna is imarat ke manare ek jaise hain

karachi ka kitchen ho ya wo dakkan ki rasoi ho

namak ka farq hai baigan baghaare ek jaise hain

pajamon ke design ko badal Dala to kya gham hai

hamari biwiyon ke to gharare ek jaise hain

pareshan-haal hai public magar donon mamalik ke

mirasi cricketer filmi-sitare ek jaise hain

kunware log to har mulk mein aazad phirte hain

magar shadi-shuda qismat ke mare ek jaise hain

barae-aqd-KHwani qaziyon mein farq hai lekin

karachi aur dilli ke chuware ek jaise hain

kunwara aadmi ho ya koi aazad leader ho

jo be-pende ke lauTe hain wo sare ek jaise hain

nikamme rahnuma aur aql se paidal siyasat-dan

hamare ek jaise hain tumhaare ek jaise hain

yahan ka 'KHalid-e-irfan' wahan ke 'rahat-indori'

nire shair hain donon ke sitare ek jaise hain