mizaj-e-dost mein kuchh barhami nazar aai

mizāj-e-dost meñ kuchh barhamī nazar aa.ī

mire ḳhulūs meñ shāyad kamī nazar aa.ī

tumhāre aane se saarā chaman mahak uTThā

kalī kalī pe tar-o-tāzgī nazar aa.ī

ye inqilāb-e-zamāna hai yā fusūn-e-nazar

hañsī bhī aap kī mahbūb sī nazar aa.ī

yahī to dard-e-judā.ī kā faiz hai mujh par

sisaktī saañs ukhaḌtī huī nazar aa.ī

ye zaḳhm-e-ishq kā ehsāñ hai rāh-e-ulfat meñ

udaas dil meñ bhī ik raushnī nazar aa.ī

hai pur-fareb ye tarz-e-amal hasīnoñ kā

zarā sī chheḌ pe vāraftagī nazar aa.ī

hujūm-e-māh-vashāñ meñ 'azīm' rah ke mujhe

qadam qadam pe baḌī bebasī nazar aa.ī

mizaj-e-dost mein kuchh barhami nazar aai

mere KHulus mein shayad kami nazar aai

tumhaare aane se sara chaman mahak uTTha

kali kali pe tar-o-tazgi nazar aai

ye inqilab-e-zamana hai ya fusun-e-nazar

hansi bhi aap ki mahbub si nazar aai

yahi to dard-e-judai ka faiz hai mujh par

sisakti sans ukhaDti hui nazar aai

ye zaKHm-e-ishq ka ehsan hai rah-e-ulfat mein

udas dil mein bhi ek raushni nazar aai

hai pur-fareb ye tarz-e-amal hasinon ka

zara si chheD pe waraftagi nazar aai

hujum-e-mah-washan mein 'azim' rah ke mujhe

qadam qadam pe baDi bebasi nazar aai