mizaj-e-husn mein yarab tu pyar paida kar

mizāj-e-husn meñ yārab tū pyaar paidā kar

nahīñ to phir mire dil meñ qarār paidā kar

baḌhā na dast-e-talab nazr-e-nāz dil kar ke

nigāh-e-husn meñ apnā vaqār paidā kar

badal de koshish-e-paiham se āb-o-gil kā mizāj

ḳhizāñ na aa.e jise vo bahār paidā kar

falak pe chaḌh ke nazar aa.e kuchh jhalak jis kī

vo aarzū dil-e-ummīd-vār paidā kar

ye bebasī to nahīñ terī shān-e-insānī

tū aadmī hai to ḳhud iḳhtiyār paidā kar

tire amal se ho saarā jahān hairat meñ

zamīn-e-shor meñ bhī lāla-zār paidā kar

dayār-e-ġham ko miTā kar basā jahān-e-ḳhushī

na.ī fazā na.e lail-o-nahār paidā kar

jo chāhtā hai 'zafar' iltifāt-e-dost idhar

to dil meñ jazba-e-be-iḳhtiyār paidā kar

mizaj-e-husn mein yarab tu pyar paida kar

nahin to phir mere dil mein qarar paida kar

baDha na dast-e-talab nazr-e-naz dil kar ke

nigah-e-husn mein apna waqar paida kar

badal de koshish-e-paiham se aab-o-gil ka mizaj

KHizan na aae jise wo bahaar paida kar

falak pe chaDh ke nazar aae kuchh jhalak jis ki

wo aarzu dil-e-ummid-war paida kar

ye bebasi to nahin teri shan-e-insani

tu aadmi hai to KHud iKHtiyar paida kar

tere amal se ho sara jahan hairat mein

zamin-e-shor mein bhi lala-zar paida kar

dayar-e-gham ko miTa kar basa jahan-e-KHushi

nai faza nae lail-o-nahaar paida kar

jo chahta hai 'zafar' iltifat-e-dost idhar

to dil mein jazba-e-be-iKHtiyar paida kar