mizaj-e-naghma-o-sher-o-sharab paida kar

mizāj-e-naġhma-o-sher-o-sharāb paidā kar

hayāt-e-ishq meñ kuchh āb-o-tāb paidā kar

nazar ko ḳhīrgī-e-shauq be-panāh mile

har ek zarre se vo āftāb paidā kar

shikast-e-ḳhvāb ke bā-vasf band haiñ āñkheñ

phir ek baar tamāshā-e-ḳhvāb paidā kar

ye be-niyāzī-e-taz.īn-e-ā.ina kab tak

kabhī kabhī to ḳhud apnā javāb paidā kar

har ek zarra hai māmūra-e-jamāl-e-habīb

dil-e-hazīñ nigah-e-kāmyāb paidā kar

dil-o-nigāh ko dhoke bhī raas aa.e haiñ

vufūr-e-tishna-labī meñ sarāb paidā kar

na kar shikāyat-e-daurāñ na ban harīf-e-zamāñ

musībatoñ kā koī sadd-e-bāb paidā kar

pahuñch buland-maqāmāt-e-sher-o-naġhma tak

adab meñ ek dil-āvez baab paidā kar

ġharaz to ye hai tirā markaz-e-nigāh rahūñ

sukūn-e-dil na sahī iztirāb paidā kar

'ra.īs' tujh ko to marne kī bhī nahīñ fursat

kahā thā kis ne ki aise azaab paidā kar

mizaj-e-naghma-o-sher-o-sharab paida kar

hayat-e-ishq mein kuchh aab-o-tab paida kar

nazar ko KHirgi-e-shauq be-panah mile

har ek zarre se wo aaftab paida kar

shikast-e-KHwab ke ba-wasf band hain aankhen

phir ek bar tamasha-e-KHwab paida kar

ye be-niyazi-e-tazin-e-aina kab tak

kabhi kabhi to KHud apna jawab paida kar

har ek zarra hai mamura-e-jamal-e-habib

dil-e-hazin nigah-e-kaamyab paida kar

dil-o-nigah ko dhoke bhi ras aae hain

wufur-e-tishna-labi mein sarab paida kar

na kar shikayat-e-dauran na ban harif-e-zaman

musibaton ka koi sadd-e-bab paida kar

pahunch buland-maqamat-e-sher-o-naghma tak

adab mein ek dil-awez bab paida kar

gharaz to ye hai tera markaz-e-nigah rahun

sukun-e-dil na sahi iztirab paida kar

'rais' tujh ko to marne ki bhi nahin fursat

kaha tha kis ne ki aise azab paida kar