مزاج یار سے دل آشنا ہے

مزاج یار سے دل آشنا ہے

کہ اک بیداد گر پر آ گیا ہے

کہاں ہے دل ہمارا جانتے ہیں

کہاں پر ضد کیے بیٹھا ہوا ہے

پتہ کیا عاقلان شہر دیتے

یہ دل آوارہ ان کو جانتا ہے

وہ جن کو ہم نے دیکھا تھا کہیں پر

وہی اک شخص دل کا مدعا ہے

کہاں بدلے گا موسم کون جانے

طبیعت تک ہوا کی ناروا ہے

اسے اب عقل والے کیا کہیں گے

مرا یہ دل کہ شب بھر جاگتا ہے

سنا تھا بھول جائیں گے اسے ہم

سنو اب تک یہی اک آسرا ہے

کہاں دفنا سکے ہیں لوگ مل کر

زباں پر ذکر اب تو برملا ہے

ہوئی ہے گم وفا کی راہ جوگیؔ

یہی اک سانحہ اب جابجا ہے