mizaj-e-yar se dil aashna hai

mizāj-e-yār se dil āshnā hai

ki ik bedād-gar par aa gayā hai

kahāñ hai dil hamārā jānte haiñ

kahāñ par zid kiye baiThā huā hai

pata kyā ‘āqilān-e-shahr dete

ye dil-āvāra un ko jāntā hai

vo jin ko ham ne dekhā thā kahīñ par

vahī ik shaḳhs dil kā mudda'ā hai

kahāñ badlegā mausam kaun jaane

tabī'at tak havā kī nāravā hai

ise ab 'aql vaale kyā kaheñge

mirā ye dil ki shab bhar jāgtā hai

sunā thā bhuul jā.eñge use ham

suno ab tak yahī ik aasrā hai

kahāñ dafnā sake haiñ log mil kar

zabāñ par zikr ab to barmalā hai

huī hai gum vafā kī raah 'jogī'

yahī ik sāniha ab jā-ba-jā hai

mizaj-e-yar se dil aashna hai

ki ek bedad-gar par aa gaya hai

kahan hai dil hamara jaante hain

kahan par zid kiye baiTha hua hai

pata kya ‘aqilan-e-shahr dete

ye dil-awara un ko jaanta hai

wo jin ko hum ne dekha tha kahin par

wahi ek shaKHs dil ka mudda'a hai

kahan badlega mausam kaun jaane

tabi'at tak hawa ki narawa hai

ise ab 'aql wale kya kahenge

mera ye dil ki shab bhar jagta hai

suna tha bhul jaenge use hum

suno ab tak yahi ek aasra hai

kahan dafna sake hain log mil kar

zaban par zikr ab to barmala hai

hui hai gum wafa ki rah 'jogi'

yahi ek saniha ab ja-ba-ja hai