moD moD ghabraya gam gam dahla main

moḌ moḌ ghabrāyā gaam gaam dahlā maiñ

jaane kin ḳharāboñ ke rāstoñ pe niklā maiñ

sat.h-e-āb kah paa.e kyā tahoñ ke afsāne

sāme-e-lab-e-sāhil bahr se bhī gahrā maiñ

aur kuchh taqāze kā silsila chale yaaro

pal meñ kaise man jā.ūñ muddatoñ kā rūThā maiñ

vo ki hai mirā apnā harf-e-mudda.ā us ko

ġhair ke havāle se kis tarah samajhtā maiñ

jaane jazb ho jā.ūñ kab fazā ke āñchal meñ

sā.atoñ kī āñkhoñ se ashk ban ke Dhalkā maiñ

ek roz to girtīñ fāsloñ kī dīvāreñ

ek roz to apne saath saath chaltā maiñ

kaun hai mirā qātil kis kā naam luuñ 'ālī'

apnī hī vafāoñ ke pāniyoñ meñ Duubā maiñ

moD moD ghabraya gam gam dahla main

jaane kin KHarabon ke raston pe nikla main

sath-e-ab kah pae kya tahon ke afsane

same-e-lab-e-sahil bahr se bhi gahra main

aur kuchh taqaze ka silsila chale yaro

pal mein kaise man jaun muddaton ka ruTha main

wo ki hai mera apna harf-e-muddaa us ko

ghair ke hawale se kis tarah samajhta main

jaane jazb ho jaun kab faza ke aanchal mein

saaton ki aankhon se ashk ban ke Dhalka main

ek roz to girtin faslon ki diwaren

ek roz to apne sath sath chalta main

kaun hai mera qatil kis ka nam lun 'ali'

apni hi wafaon ke paniyon mein Duba main