mohabbat aap apni tarjuman hai

mohabbat aap apnī tarjumāñ hai

yahī ḳhud chashm o dil lafz o bayāñ hai

nigāhoñ meñ bahār-e-jāvedāñ hai

jahāñ maiñ huuñ vahīñ ab āshiyāñ hai

mohabbat donoñ jānib mehrbāñ hai

ki ham us se vo ham se bad-gumāñ hai

vo kab se muztarib haiñ ai ġham-e-'ishq

ḳhudā jaane terī ġhairat kahāñ hai

hamārī rif'atoñ kā pūchhnā kyā

jahāñ ham paañv rakh deñ āsmāñ hai

koī āvāz hī de gum-shuda dil

kahāñ hai o mire yūsuf kahāñ hai

agar tū hai to ai jān-e-do-'ālam

yahāñ har shai javāñ jāvedāñ hai

maze soz-e-darūñ ke mil rahe haiñ

ba-hamd-o-lillāh ki dil ātish-ba-jāñ hai

tamāshā dīdanī hai dekh jaao

zabān-e-shauq o gulbāñg fuġhāñ hai

mubārakbād ai jazb-e-mohabbat

unheñ apne par ab merā gumāñ hai

kisī ko ik nazar hī dekh to leñ

ab itnī bhī hameñ jur.at kahāñ hai

tire naqsh-e-qadam kā zarra zarra

ibādat-gāh-e-jān-e-āshiqāñ hai

ilāhī ḳhair karnā der se phir

bahut muztar nigāh-e-rāzdāñ hai

phuñkā jaatā hai dil jis soz-e-ġham se

jahannam meñ ye chingārī kahāñ hai

jo paḌh saktā hai to paḌh ai ġham-e-dil

ki in nazroñ meñ aaj ik dāstāñ hai

mohabbat aap apni tarjuman hai

yahi KHud chashm o dil lafz o bayan hai

nigahon mein bahaar-e-jawedan hai

jahan main hun wahin ab aashiyan hai

mohabbat donon jaanib mehrban hai

ki hum us se wo hum se bad-guman hai

wo kab se muztarib hain ai gham-e-'ishq

KHuda jaane teri ghairat kahan hai

hamari rif'aton ka puchhna kya

jahan hum panw rakh den aasman hai

koi aawaz hi de gum-shuda dil

kahan hai o mere yusuf kahan hai

agar tu hai to ai jaan-e-do-'alam

yahan har shai jawan jawedan hai

maze soz-e-darun ke mil rahe hain

ba-hamd-o-lillah ki dil aatish-ba-jaan hai

tamasha didani hai dekh jao

zaban-e-shauq o gulbang fughan hai

mubarakbaad ai jazb-e-mohabbat

unhen apne par ab mera guman hai

kisi ko ek nazar hi dekh to len

ab itni bhi hamein jurat kahan hai

tere naqsh-e-qadam ka zarra zarra

ibaadat-gah-e-jaan-e-ashiqan hai

ilahi KHair karna der se phir

bahut muztar nigah-e-raazdan hai

phunka jata hai dil jis soz-e-gham se

jahannam mein ye chingari kahan hai

jo paDh sakta hai to paDh ai gham-e-dil

ki in nazron mein aaj ek dastan hai