محبت اور کسی انجان سے اف

محبت اور کسی انجان سے اف

الجھنا اور دل نادان سے اف

اچانک فون کیا آیا کسی کا

لگی ہیں دھڑکنیں سب کان سے اف

وہ جس شدت سے مجھ کو چاہتا ہے

چلی جاؤں نہ اپنی جان سے اف

میں اس کی خواہشوں کو کیسے ٹالوں

وہ دیکھے ہے بڑے ارمان سے اف

میں اس کی جان ہوں جاؤں تو کیسے

وہ جیتا ہے مجھے جی جان سے اف

محبت جب سے ہے روحوں میں اتری

مہکتے ہیں بدن لوبان سے اف

کرنؔ اس عشق میں انساں تو انساں

فرشتے بھی گئے ایمان سے اف