mohabbat bais-e-diwangi hai aur bas main hun

mohabbat bā.is-e-dīvāngī hai aur bas maiñ huuñ

ki ab paiham ināyat aap kī hai aur bas maiñ huuñ

sukūñ hāsil hai din meñ aur na shab ko chain miltā hai

ki ab to kashmakash meñ zindagī hai aur bas maiñ huuñ

na jaane mājrā kyā hai nazar kuchh bhī nahīñ aatā

ki ab hadd-e-nazar tak tīrgī hai aur bas maiñ huuñ

nahīñ hai aaj mujh ko ḳhadsha-e-zulmat zamāne meñ

ruḳh-e-tābāñ kī un ke raushnī hai aur bas maiñ huuñ

qadam kyā Dagmagā.eñge rah-e-ulfat meñ ai saaqī

bahut hī muḳhtasar sī be-ḳhudī hai aur bas maiñ huuñ

tire naqsh-e-qadam par sar jhukānā kaam hai apnā

ḳhudā shāhid ye merī bandagī hai aur bas maiñ huuñ

unheñ rūdād-e-ġham apnī sunā.ūñ kis tarah 'qaisar'

vahī un kī adā-e-barhamī hai aur bas maiñ huuñ

mohabbat bais-e-diwangi hai aur bas main hun

ki ab paiham inayat aap ki hai aur bas main hun

sukun hasil hai din mein aur na shab ko chain milta hai

ki ab to kashmakash mein zindagi hai aur bas main hun

na jaane majra kya hai nazar kuchh bhi nahin aata

ki ab hadd-e-nazar tak tirgi hai aur bas main hun

nahin hai aaj mujh ko KHadsha-e-zulmat zamane mein

ruKH-e-taban ki un ke raushni hai aur bas main hun

qadam kya Dagmagaenge rah-e-ulfat mein ai saqi

bahut hi muKHtasar si be-KHudi hai aur bas main hun

tere naqsh-e-qadam par sar jhukana kaam hai apna

KHuda shahid ye meri bandagi hai aur bas main hun

unhen rudad-e-gham apni sunaun kis tarah 'qaisar'

wahi un ki ada-e-barhami hai aur bas main hun