mohabbat bikti ho gar shahr mein aisi dukan DhunDen

mohabbat biktī ho gar shahr meñ aisī dukāñ DhūñDeñ

kudūrat dil kī dhultī ho jahāñ aisī dukāñ DhūñDeñ

sukūn-e-dil mayassar ho koī aisā makāñ DhūñDeñ

munāsib ab nahīñ har chiiz meñ sūd-o-ziyāñ DhūñDeñ

bigaḌtī baat bhī ban jaatī hai shīrīñ-zabānī se

agar biktī ho tere shahr meñ aisī zabāñ DhūñDeñ

kahāñ tak nafratoñ kī chhat pe baiThe dhuup señkoge

utar aao zamīñ par pyaar kā koī makāñ DhūñDeñ

sunā hai shahr meñ hafte kā ik bāzār lagtā hai

agar bhūle se mil jaa.e vahāñ urdu zabāñ DhūñDeñ

shab-e-dījūr kī chorī ho yā ho roz-e-raushan kī

pata to mil hī jā.egā chalo koī nishāñ DhūñDeñ

bahut mushkil hai lafzoñ meñ pironā dil kī hālat ko

batā.e hī binā jo baat kah de vo bayāñ DhūñDeñ

bahut ghabrā ga.e haiñ zindagī ke shor se 'ālam'

jahāñ bajtī ho bansī chain kī aisā jahāñ DhūñDeñ

mohabbat bikti ho gar shahr mein aisi dukan DhunDen

kudurat dil ki dhulti ho jahan aisi dukan DhunDen

sukun-e-dil mayassar ho koi aisa makan DhunDen

munasib ab nahin har chiz mein sud-o-ziyan DhunDen

bigaDti baat bhi ban jati hai shirin-zabani se

agar bikti ho tere shahr mein aisi zaban DhunDen

kahan tak nafraton ki chhat pe baiThe dhup senkoge

utar aao zamin par pyar ka koi makan DhunDen

suna hai shahr mein hafte ka ek bazar lagta hai

agar bhule se mil jae wahan urdu zaban DhunDen

shab-e-dijur ki chori ho ya ho roz-e-raushan ki

pata to mil hi jaega chalo koi nishan DhunDen

bahut mushkil hai lafzon mein pirona dil ki haalat ko

batae hi bina jo baat kah de wo bayan DhunDen

bahut ghabra gae hain zindagi ke shor se 'alam'

jahan bajti ho bansi chain ki aisa jahan DhunDen