mohabbat dard-o-gham ki tarjuman malum hoti hai

mohabbat dard-o-ġham kī tarjumāñ ma.alūm hotī hai

mirī har aah dil kī dāstāñ ma.alūm hotī hai

hamārī zindagī kī dāstāñ ḳhushbū kā unvāñ thī

magar is daur meñ āh-o-fuġhāñ ma.alūm hotī hai

jahāñ dekho vahīñ maiñ āshiyāñ apnā banātā huuñ

jahāñ girtī huī barq-e-tapāñ ma.alūm hotī hai

ye kis manzil meñ le aayā tajassus dost kā mujh ko

haqīqat bhī jahāñ ik dāstāñ ma.alūm hotī hai

ye aalam hai nigāh-e-shauq kī ab be-sabātī kā

bahār-e-gulshan-e-ālam ḳhizāñ ma.alūm hotī hai

vo chashm-e-pur-fusūñ 'iqbāl' jis ne ġham diye lākhoñ

na pūchho āj-kal kyoñ mehrbāñ ma.alūm hotī hai

mohabbat dard-o-gham ki tarjuman malum hoti hai

meri har aah dil ki dastan malum hoti hai

hamari zindagi ki dastan KHushbu ka unwan thi

magar is daur mein aah-o-fughan malum hoti hai

jahan dekho wahin main aashiyan apna banata hun

jahan girti hui barq-e-tapan malum hoti hai

ye kis manzil mein le aaya tajassus dost ka mujh ko

haqiqat bhi jahan ek dastan malum hoti hai

ye aalam hai nigah-e-shauq ki ab be-sabaati ka

bahaar-e-gulshan-e-alam KHizan malum hoti hai

wo chashm-e-pur-fusun 'iqbaal' jis ne gham diye lakhon

na puchho aaj-kal kyon mehrban malum hoti hai