mohabbat dil pe karti hai asar aahista aahista

mohabbat dil pe kartī hai asar āhista āhista

marīz-e-ġham ko hotī hai ḳhabar āhista āhista

ḳhudā ab jaane kyā anjām ho is sajda-rezī kā

ghisā jaatā hai terā sañg-e-dar āhista āhista

junūn-e-ishq le aayā hai āḳhir dasht-e-ġhurbat meñ

muqaddar ban ga.ī gard-e-safar āhista āhista

kiyā hai jumbish-e-lab ne mujhe behāl kuchh aisā

maiñ yuuñ to saañs letā huuñ magar āhista āhista

ubhar aa.egā apne vasl kā ḳhurshīd bhī ik din

magar hogī shab-e-ġham muḳhtasar āhista āhista

bachā.ūñ kis tarah kachche makāñ ko tez bārish meñ

gire jaate haiñ sab dīvār-o-dar āhista āhista

nahīñ martā yakāyak be-irāda nāznīnoñ par

chhiḌaktā huuñ maiñ jaañ un par magar āhista āhista

kisī ke duur rahne se mohabbat kam nahīñ hotī

magar barbād hotā hai jigar āhista āhista

ġhazab hai bazm meñ terā ye kaif-añgez nazzāra

huā jaatā huuñ ḳhud se be-ḳhabar āhista āhista

mujhe karne lagā hai ḳhānamāñ-barbād ġham terā

vatan meñ ho gayā huuñ dar-ba-dar āhista āhista

umañD aa.ī hai kyuuñ tārīk shab atrāf-e-ālam par

kahāñ gum ho ga.e shams-o-qamar āhista āhista

'muzaffar' raaz poshīda rahegā kaise mahfil meñ

lahū Tapkā rahī hai chashm-e-tar āhista āhista

mohabbat dil pe karti hai asar aahista aahista

mariz-e-gham ko hoti hai KHabar aahista aahista

KHuda ab jaane kya anjam ho is sajda-rezi ka

ghisa jata hai tera sang-e-dar aahista aahista

junun-e-ishq le aaya hai aaKHir dasht-e-ghurbat mein

muqaddar ban gai gard-e-safar aahista aahista

kiya hai jumbish-e-lab ne mujhe behaal kuchh aisa

main yun to sans leta hun magar aahista aahista

ubhar aaega apne wasl ka KHurshid bhi ek din

magar hogi shab-e-gham muKHtasar aahista aahista

bachaun kis tarah kachche makan ko tez barish mein

gire jate hain sab diwar-o-dar aahista aahista

nahin marta yakayak be-irada nazninon par

chhiDakta hun main jaan un par magar aahista aahista

kisi ke dur rahne se mohabbat kam nahin hoti

magar barbaad hota hai jigar aahista aahista

ghazab hai bazm mein tera ye kaif-angez nazzara

hua jata hun KHud se be-KHabar aahista aahista

mujhe karne laga hai KHanaman-barbaad gham tera

watan mein ho gaya hun dar-ba-dar aahista aahista

umanD aai hai kyun tarik shab atraf-e-alam par

kahan gum ho gae shams-o-qamar aahista aahista

'muzaffar' raaz poshida rahega kaise mahfil mein

lahu Tapka rahi hai chashm-e-tar aahista aahista