mohabbat din-ba-din mail-ba-wahdat hoti jati hai

mohabbat din-ba-din mā.il-ba-vahdat hotī jaatī hai

har ik sūrat meñ paidā un kī sūrat hotī jaatī hai

jhukā karte haiñ sar jis par gadāoñ aur shāhoñ ke

usī dar kī gadā.ī apnī qismat hotī jaatī hai

du'ā bhī māñgne par ab to dil raazī nahīñ hotā

tabī'at hai ki pāband-e-mashiyyat hotī jaatī hai

mire mā'būd jitne aa rahe ho paas tum mere

mujhe duniyā ke hangāmoñ se fursat hotī jaatī hai

tumhārī zaat meñ gum ho rahī hai ab mirī hastī

jo chāhat thī kabhī ab vo 'ibādat hotī jaatī hai

nuqūsh-e-mā-sivā ab zindagī se miTte jaate haiñ

hayāt-e-muḳhtasar tum se 'ibārat hotī jaatī hai

salīqa aa gayā hai jab se jiine aur marne kā

do-chand is zindagī kī qadr-o-qīmat hotī jaatī hai

irāda kar liyā hai jab se ham ne tark-e-duniyā kā

jo duniyā bad-numā thī ḳhūb-sūrat hotī jaatī hai

'shifā' jab se bharosa kar liyā hai un kī hikmat par

na kuchh milne pe bhī takmīl-e-hasrat hotī jaatī hai

mohabbat din-ba-din mail-ba-wahdat hoti jati hai

har ek surat mein paida un ki surat hoti jati hai

jhuka karte hain sar jis par gadaon aur shahon ke

usi dar ki gadai apni qismat hoti jati hai

du'a bhi mangne par ab to dil raazi nahin hota

tabi'at hai ki paband-e-mashiyyat hoti jati hai

mere ma'bud jitne aa rahe ho pas tum mere

mujhe duniya ke hangamon se fursat hoti jati hai

tumhaari zat mein gum ho rahi hai ab meri hasti

jo chahat thi kabhi ab wo 'ibaadat hoti jati hai

nuqush-e-ma-siwa ab zindagi se miTte jate hain

hayat-e-muKHtasar tum se 'ibarat hoti jati hai

saliqa aa gaya hai jab se jine aur marne ka

do-chand is zindagi ki qadr-o-qimat hoti jati hai

irada kar liya hai jab se hum ne tark-e-duniya ka

jo duniya bad-numa thi KHub-surat hoti jati hai

'shifa' jab se bharosa kar liya hai un ki hikmat par

na kuchh milne pe bhi takmil-e-hasrat hoti jati hai