mohabbat ghair-fani hai maraz hai la-dawa mera

mohabbat ġhair-fānī hai maraz hai lā-davā merā

ḳhudā kī zaat baaqī hai mohabbat hai ḳhudā merā

na jiite jī huā hargiz vafā nā-āshnā merā

par us kī dāstāñ ban kar rahā zikr-e-vafā merā

jafā kā terī tālib huuñ vafā hai mudda.ā merā

yaqīn-e-nā-murādī par bhī dekho hausla merā

ye kaisī chheḌ hai kyoñ pūchhte ho mudda.ā-e-dil

hue jab mudda.ī ke tum suno kyuuñ mudda.ā merā

paḌe kyuuñ soch meñ tum qatl karke mehrbāñ mujh ko

vafā kī thī ḳhatā kī thī nahīñ kuchh ḳhūñ-bahā merā

nahīñ ma.alūm kis par aaj phir mashq-e-jafā hogī

ki hai un ke laboñ par aaj phir zikr-e-vafā merā

dil-āzārī kā baa.is ho nahīñ saktī jafā terī

vahī hai nā-murādī par bhī andāz-e-vafā merā

ḳhudā jaane harīm-e-nāz hai kitnī bulandī par

ki guzrīñ muddateñ lekin hai naala nā-rasā merā

mujhe mahshar meñ bhī ummīd kam hai daad paane kī

ḳhudā.ī jab butoñ kī hai to kyā hogā ḳhudā merā

masīhā.ī kā un kī imtihāñ manzūr hai varna

mujhe ma.alūm hai 'beḳhud' maraz hai lā-davā merā

mohabbat ghair-fani hai maraz hai la-dawa mera

KHuda ki zat baqi hai mohabbat hai KHuda mera

na jite ji hua hargiz wafa na-ashna mera

par us ki dastan ban kar raha zikr-e-wafa mera

jafa ka teri talib hun wafa hai muddaa mera

yaqin-e-na-muradi par bhi dekho hausla mera

ye kaisi chheD hai kyon puchhte ho muddaa-e-dil

hue jab muddai ke tum suno kyun muddaa mera

paDe kyun soch mein tum qatl karke mehrban mujh ko

wafa ki thi KHata ki thi nahin kuchh KHun-baha mera

nahin malum kis par aaj phir mashq-e-jafa hogi

ki hai un ke labon par aaj phir zikr-e-wafa mera

dil-azari ka bais ho nahin sakti jafa teri

wahi hai na-muradi par bhi andaz-e-wafa mera

KHuda jaane harim-e-naz hai kitni bulandi par

ki guzrin muddaten lekin hai nala na-rasa mera

mujhe mahshar mein bhi ummid kam hai dad pane ki

KHudai jab buton ki hai to kya hoga KHuda mera

masihai ka un ki imtihan manzur hai warna

mujhe malum hai 'beKHud' maraz hai la-dawa mera