mohabbat hasil-e-duniya-o-din hai

mohabbat hāsil-e-duniyā-o-dīñ hai

mohabbat rūh-e-arbāb-e-yaqīñ hai

nazar meñ jhuum uThtī haiñ bahāreñ

kisī kī yaad bhī kitnī hasīñ hai

tasadduq ho rahe haiñ māh-o-anjum

nigāhoñ meñ vahī zohra-jabīñ hai

kahāñ mumkin hai us ko bhuul jaanā

ki har ik naqsh us kā dil-nashīñ hai

jahāñ chāhūñ vahīñ mahfil sajā luuñ

mirī har ik nazar husn-āfrīñ hai

vahī vo haiñ jidhar bhī dekhtā huuñ

bas ab un ke sivā koī nahīñ hai

zamāna ho gayā us ik nazar ko

ḳhalish sī aaj tak dil ke qarīñ hai

huā huuñ muddatoñ se ḳhud-farāmosh

magar ye dil tujhe bhūlā nahīñ hai

sahārā mil gayā jiine kā 'muztar'

mujhe un kī mohabbat kā yaqīñ hai

mohabbat hasil-e-duniya-o-din hai

mohabbat ruh-e-arbab-e-yaqin hai

nazar mein jhum uThti hain bahaaren

kisi ki yaad bhi kitni hasin hai

tasadduq ho rahe hain mah-o-anjum

nigahon mein wahi zohra-jabin hai

kahan mumkin hai us ko bhul jaana

ki har ek naqsh us ka dil-nashin hai

jahan chahun wahin mahfil saja lun

meri har ek nazar husn-afrin hai

wahi wo hain jidhar bhi dekhta hun

bas ab un ke siwa koi nahin hai

zamana ho gaya us ek nazar ko

KHalish si aaj tak dil ke qarin hai

hua hun muddaton se KHud-faramosh

magar ye dil tujhe bhula nahin hai

sahaara mil gaya jine ka 'muztar'

mujhe un ki mohabbat ka yaqin hai