mohabbat hai hamein shayad kisi aaina-talat se

mohabbat hai hameñ shāyad kisī ā.īna-tal.at se

misāl-e-ā.ina takte haiñ muñh ik ik kā hairat se

ujālā mere kāshāne meñ hai dāġh-e-mohabbat se

ġharaz ab chāñdnī se hai na sham-e-bazm-e-ishrat se

kabhī āsūdgī dekhī na ham ne bazm-e-hastī meñ

khulī kyoñ haa.e aañkh apnī adam ke ḳhvāb-e-rāhat se

mirī ai be-ḳhudī allāh de umr-e-ḳhizar tujh ko

ḳhajil huuñ maiñ na armāñ se na sharminda huuñ hasrat se

kareñ talvoñ se apne kyoñ judā ḳhār-e-bayābāñ ko

ba-sad-minnat lagā laa.e haiñ un ko dasht-e-ġhurbat se

dil-e-hangāma-zā par ik sukūn-e-yās taarī hai

tamannāoñ kī shorish miT ga.ī ġham-hā-e-furqat se

bujheñge āñsūoñ ke sail se ai ġham tire sho.ale

jahannum sard ho jaatī hai jaise āb-e-rahmat se

uThī chilman huā husn-e-pur-āshob us kā be-parda

magar maiñ rah gayā majbūr in āñkhoñ kī hairat se

'valī' phir ik ġhazal paḌh de badal kar bahr mahfil meñ

tire ash.ār ko sunte haiñ ham gosh-e-mohabbat se

mohabbat hai hamein shayad kisi aaina-talat se

misal-e-aina takte hain munh ek ek ka hairat se

ujala mere kashane mein hai dagh-e-mohabbat se

gharaz ab chandni se hai na sham-e-bazm-e-ishrat se

kabhi aasudgi dekhi na hum ne bazm-e-hasti mein

khuli kyon hae aankh apni adam ke KHwab-e-rahat se

meri ai be-KHudi allah de umr-e-KHizar tujh ko

KHajil hun main na arman se na sharminda hun hasrat se

karen talwon se apne kyon juda KHar-e-bayaban ko

ba-sad-minnat laga lae hain un ko dasht-e-ghurbat se

dil-e-hangama-za par ek sukun-e-yas tari hai

tamannaon ki shorish miT gai gham-ha-e-furqat se

bujhenge aansuon ke sail se ai gham tere shoale

jahannum sard ho jati hai jaise aab-e-rahmat se

uThi chilman hua husn-e-pur-ashob us ka be-parda

magar main rah gaya majbur in aankhon ki hairat se

'wali' phir ek ghazal paDh de badal kar bahr mahfil mein

tere ashaar ko sunte hain hum gosh-e-mohabbat se