mohabbat hai na zauq-e-arzu hai

mohabbat hai na zauq-e-ārzū hai

hayāt ab kis qadar be-rang-o-bū hai

tasavvur meñ nahīñ jalva kisī kā

nazar meñ hai na koī rū-barū hai

kabhī Darte the jis ke vahm se bhī

vahī manzar nazar meñ hū-bahū hai

fazā sunsān hai aur hū kā 'ālam

añdherā aur vahshat chār-sū hai

nahīñ vo raunaq-e-sehn-e-gulistāñ

bahāroñ meñ na vo josh-e-numū hai

girāñ sī hai nazar ko sair-e-ālam

kamī har shai meñ goyā kū-bakū hai

umangeñ haiñ na vo ab valvale haiñ

na shauq-e-sa'ī-o-zauq-e-justujū hai

miTā jab dil se ehsās-e-mohabbat

ḳhushī bhī ġham hai ik tauq-e-gulū hai

kisī kī kaj-nigāhī kā gila kyā

zamāne kī yahī fitrat hai ḳhū hai

ba-īñ-kaifiyyat-e-sad-huzn-o-hasrat

nazar meñ aaj bhī bas tū hī tū hai

mohabbat hai na zauq-e-arzu hai

hayat ab kis qadar be-rang-o-bu hai

tasawwur mein nahin jalwa kisi ka

nazar mein hai na koi ru-baru hai

kabhi Darte the jis ke wahm se bhi

wahi manzar nazar mein hu-bahu hai

faza sunsan hai aur hu ka 'alam

andhera aur wahshat chaar-su hai

nahin wo raunaq-e-sehn-e-gulistan

bahaaron mein na wo josh-e-numu hai

giran si hai nazar ko sair-e-alam

kami har shai mein goya ku-baku hai

umangen hain na wo ab walwale hain

na shauq-e-sa'i-o-zauq-e-justuju hai

miTa jab dil se ehsas-e-mohabbat

KHushi bhi gham hai ek tauq-e-gulu hai

kisi ki kaj-nigahi ka gila kya

zamane ki yahi fitrat hai KHu hai

ba-in-kaifiyyat-e-sad-huzn-o-hasrat

nazar mein aaj bhi bas tu hi tu hai