mohabbat hai to phir andaza-e-shauq-e-wafa kyon ho

mohabbat hai to phir andāza-e-shauq-e-vafā kyoñ ho

shikāyat dard kī kyoñ ho jafāoñ kā gila kyoñ ho

kisī ke kaan tak pahuñche vo merī iltijā kyoñ ho

bar aanā jis kā mumkin ho vo merā mudda.ā kyoñ ho

ye rāh-e-ishq hai ai dil ma.āl-andeshiyāñ kaisī

junūñ hai dastgīr apnā koī zanjīr-e-pā kyoñ ho

hayāt-e-ārzū parvarda-e-āġhosh-e-tūfāñ hai

jise ho fikr sāhil kī vo merā nāḳhudā kyoñ ho

na ye fariyād hogī phir na ye aaheñ na ye naale

dil-e-nādāñ mohabbat meñ haqīqat-āshnā kyoñ ho

vo nazreñ ḳhaak meñ jin ko milānā bhī nahīñ aatā

unhīñ nazroñ se vābasta hamārā mudda.ā kyoñ ho

hudūd-e-shash-jihat se māvarā jab us ke jalve haiñ

to parvāz-e-mohabbat tā-ba-hadd-e-do-sarā kyoñ ho

ḳhudā ke yaad aane kā baḌā achchhā zarīya hai

shanāsā-e-karam vo bāni-e-jaur-o-jafā kyoñ ho

muhīt-e-arsh-o-kursī jab ḳhudā kā zill-e-rahmat hai

'munīr' apnī ḳhatā-koshī kī koī intihā kyoñ ho

mohabbat hai to phir andaza-e-shauq-e-wafa kyon ho

shikayat dard ki kyon ho jafaon ka gila kyon ho

kisi ke kan tak pahunche wo meri iltija kyon ho

bar aana jis ka mumkin ho wo mera muddaa kyon ho

ye rah-e-ishq hai ai dil maal-andeshiyan kaisi

junun hai dastgir apna koi zanjir-e-pa kyon ho

hayat-e-arzu parwarda-e-aghosh-e-tufan hai

jise ho fikr sahil ki wo mera naKHuda kyon ho

na ye fariyaad hogi phir na ye aahen na ye nale

dil-e-nadan mohabbat mein haqiqat-ashna kyon ho

wo nazren KHak mein jin ko milana bhi nahin aata

unhin nazron se wabasta hamara muddaa kyon ho

hudud-e-shash-jihat se mawara jab us ke jalwe hain

to parwaz-e-mohabbat ta-ba-hadd-e-do-sara kyon ho

KHuda ke yaad aane ka baDa achchha zariya hai

shanasa-e-karam wo bani-e-jaur-o-jafa kyon ho

muhit-e-arsh-o-kursi jab KHuda ka zill-e-rahmat hai

'munir' apni KHata-koshi ki koi intiha kyon ho