mohabbat husn ka ejaz bhi hai

mohabbat husn kā e'jāz bhī hai

mohabbat ruuh kī āvāz bhī hai

kiyā kartā huuñ sajde apne dil ko

ye terī bārgāh-e-nāz bhī hai

tabassum bhī hai ġhunchoñ kī chaTak meñ

aur andāz-e-shikast-e-sāz bhī hai

safīna bhī hai girdāb-e-balā meñ

mizāj-e-nāḳhudā nā-sāz bhī hai

sunā.eñ ham kise afsāna-e-ġham

yahāñ koī sharīk-e-rāz bhī hai

nazar un kī na kyoñ naġhme sunā.e

mirā dil gosh-bar-āvāz bhī hai

kabhī ye dil hai sahrā kā namūna

kabhī ye dil gulistāñ-sāz bhī hai

khanak is ko na shīshe kī samajhiye

shikast-e-dil kī ye āvāz bhī hai

mohabbat husn ka e'jaz bhi hai

mohabbat ruh ki aawaz bhi hai

kiya karta hun sajde apne dil ko

ye teri bargah-e-naz bhi hai

tabassum bhi hai ghunchon ki chaTak mein

aur andaz-e-shikast-e-saz bhi hai

safina bhi hai girdab-e-bala mein

mizaj-e-naKHuda na-saz bhi hai

sunaen hum kise afsana-e-gham

yahan koi sharik-e-raaz bhi hai

nazar un ki na kyon naghme sunae

mera dil gosh-bar-awaz bhi hai

kabhi ye dil hai sahra ka namuna

kabhi ye dil gulistan-saz bhi hai

khanak is ko na shishe ki samajhiye

shikast-e-dil ki ye aawaz bhi hai